ROXAS CITY – Masadya nga ginpakigbahin sang pila ka miyembro sang Hatid Aral, isa ka non-profit organization nga nangin madinalag-on ang ila duwa ka bulan nga pagbulig sa mga kabtaan sa sulod sang duwa ka bulan diri sa Capiz.
Mahibaluan ang nasambit nga organisasyon ang may tinutuyo nga mahatagan sang nagakaigo nga bulig ang mga kubos ukon underprivilege nga mga kabataan sa patag sang edukasyon, ikaayong lawas, kalikasan, kag pangabuy-anan para sa ila mga ginikanan.
Sa interview sang Bombo Radyo kay Professor Eden Alam, Coordinator sang Hatid Aral Capiz Chapter, pagalibuton nila ang mga kabarangayan sa bug-os nga probinsya agud mabuligan ang mga kabataan naga-edad 5-8 anyos nga mangin recipiente sang ila nga programa.
Orihinal nga gintukod sang founder nga si Mr. Charlon Gonzaga ang Hatid Aral sa bahin sang Quezon City sang tuig 2018, samtang subong nga tuig sa bulan sang Agosto gin-adaptar ini diri sa probinsya sang Capiz.
Suno kay Prof. Alam, sa sulod sang duwa ka bulan nila nga bulontaryo nga pagserbisyo, tatlo ka barangay na ang ila napadulongan kalakip ang Barangay Mianay sa Sigma, Jeana Norte sa Jamindan, kag Quios sa Panitan.
Malipayon sini nga ginpakigbahin nga 100 ang ila mangin recipiente sa Barangay Banica nga amu ang masunod nila nga pagakadtuan.
Ginpahayag naman ni Ms. Rina Mirzi Duro, tiglikom sang organisasyon, ginapatigayon ang programa sa kada adlaw sang Sabado kun sa diin sa una nga session ginakuha nila ang atensyon sang kabataan pinaagi sa energizer, sa amu man nga tion ginatudluan coloring kag drawing ang mga bata.
Sa ikaduwa nga session ginatudluan magbasa kag sulat ang kabataan, kag sa ikatlo nga Sabado diri ginapatigayon ang graduation, paghatag sang certificate, kag alkansya agud sa lamharon pa lang nga edad matudluan na ang kabataan magtipon.
Dugang pa sini nga kabulig nila sa pagpatigayon sang programa sa kada barangay ang organisasyon man sang Alpa Kappa RHO, kag Kiwanis Club.
Ginsiling ni Prof. Alam nga apisar wala sila diri sang may ginabaton nga suweldo, bukas ini sa ila tagipusuon nga magbulig sa mga kabataan kag bilang isa man ka manunudlo.
Panugyan sini sa luyag magbulig sa ila nga makig-angut lamang ukon bisitahon ang ila Facebook page: Hatid Aral Capiz Chapter kag magpadala sang mensahe.
Mas maayo suno diri nga kun luyag magbulig mas maayo nga ihatag ang ano man nga kagamitan nga makabulig sa mga kabataan ilabi na sa pag-eskwela.
