ROXAS CITY – Ginaselebrar ang National Flag Day sa Mayo 28 kada tuig sandig sa deklarasyon sa Presidential Proclamation 374 sa idalom ni anay President Diosdado Macapagal sang 1965.
Ginpakigbahin ni Historian Professor Xiao Chua ang kasaysayan sang okasyon amo man ang pila sa mga ‘facts’ natuhoy sa hayahay sang Pilipinas.
Suno kay Chua, ang Philippine flag ang gindisenyo ni General Emilio Aguinaldo kag gintahi sang tatlo ka mga babaye sa Hong Kong lakip na sanday Marcela Agoncillo, iya anak nga si Lorenza, kag si Delfina Herbosa de Natividad.
Una nga ginwagayway ang hayahay sang Mayo 28,1898.
Suno naman sa National Historial Commission of the Philippines (NHCP), ang Philippine flag ang gin-ban sang 1907 sang ginsakop sang Amerikano ang Pilipinas.
Dugang pa sang NHCP, may yara sang Flag Law of 1907 nga nagadumili sa mga Filipinos nga i-display ang hayahay apisar sa sulod sang balay.
Tuig 1919 sang gin-sponsor ni Senator Rafael Palma ang Senate Bill No. 1 matapos ginrekomenda ni Governor Gen. Francis Harrison nga kinahanglan islan ang layi bangud wala naman naga-eksister pa ang indi pagsaligay sa tunga sang mga Filipinos kag Americans.
Sa amo man nga tuig, gin-aprubahan ang bag-o nga layi kag gindula ang pag-ban sang Philippine flag.
Gin-remind ni Chua ang mga Filipinos nga ang Philippine flag ang isa ka produkto sang Philippine revolution.
Ini man ang nagasimbolo sang pag-isa sang mga Pinoy sa pihak sang mga kinalain sang isa kag isa.
