ROXAS CITY – Personal nga nagpakigkita sa pamunuan sang Provincial Environment and Natural Resources Office (PENRO) ang punong barangay sang Barangay Lanot, Roxas City agud mapalab-ot ang pagtambak sang hospital waste sang Roxas Memorial Provincial Hospital sa out patient department sang ospital sa Capitol Hills.
Ginpahayag ni Kapitan Rolando Tuazon nga wala sang koordinasyon sa pamunuan sang Barangay Lanot ang pagtambak sang hazardous waste sa nasakupan nga barangay.
Naalarma ang opisyal sang may nagpalab-ot sa iya sang impormasyon angut diri bangud iya nahibaluan kun ano ka-delikado ang hospital waste sa ikaayong lawas sang mga pumuluyo, labi na nga gikan ang mga basura sa RMPH nga gindesignar nga COVID-19 facility sa probinsiya sang Capiz.
Nagapati si Kap. Tuazon nga may mandu gikan sa RMPH ang pagtambak sang basura bangud indi magmatu mato ang mga driver sang truck dala sang basura sa Capitol Hills kun wala sang may nagsugo sa iya halin sa ibabaw.
Samtang ginpanindugan sang opisyal nga ini magpasugot nga himoon tambakan sang hazardous waste ang iya barangay bangud nahibaluan sini kun ano ka peligroso ang basura gikan sa ospital labi na karon nga nagapangatubang sang global health crisis ang bilog nga kalibutan nga dala sang COVID-19 pandemic.
