ROXAS CITY – Ginklaro sang head sang Administrative Department Manager sang Metro Roxas Water District ukon MRWD kag Chairperson sang Bids and Awards Committee nga wala pa sang kontrata nga ginpasulod ang talatapan angut sa plano nga pagbakal sang bulk water.
Ini ang ginpahayag ni Atty. Dante Arcangeles sang mainterview sang Bombo Radyo.
Suno kay Arcangeles nga nagasugod ang proseso sini sa Annual Procurement Plan ukon APP kun sa diin gina-paaprubahan ini sa General Manager kag Board of Directors antes magtakop ang tuig agud nga pondohan ang gina-request nga pagbakal sang tubig.
Ginpahayag naman ni Arcangeles nga kun madayon ang nasambit nga plano, daku ang posibilidad nga may yara sang rate increase sa balayran sang tubig nga abagahon sang mga kunsomidor.
Dugang pa sini nga base sa ila nga paglantaw wala man sang problema sa suplay sang tubig apang ang ikinalain lamang sini treated na ang tubig nga magadiretsu sa water reserbua.
Kasunod sini magagamit sa gihapon ang MRWD sang mga pumping ukon pipes equipment’s pakadto sa gripo sang mga kunsomidor.
Ginpanindugan pa sini nga daku ang mangin kapierdehan sang kalakip na ang pagsaka sang taripa sa tion nga madayon ang plano nga pagbakal sang tubig gikan sa isa ka pribado nga supplier.
Samtang, nagpakigbahin naman sang iya opinyon ang wala na ginhingadlan nga kunsomidor nga posible ginahimo lamang ini sang talatapan agud nga kwartahan ang mga concessionaires.
Kabangdanan nga magaantus naman ang mga kunsomidor bangud sa tuman ka mahal nga pagsuluktan sang tubig.
Indi man ini magpati nga kulang ang kwarta sang talatapan bangud posible ginagamit lamang ini nga negosyo sang tagdumalahan sang MRWD.
