ROXAS CITY – Nagpaathag ang head sang special concern office kag focal person angut sa wala nasunod nga social distancing protocol sa pagpanagtag sang ayuda sa mga vendors sang DSWD sa Villareal stadium kahapon.
Sa exclusive interview sang Bombo Radyo kay Mr. Arnold Canto, aminado ini nga wala ginalauman ang pagkumpol sang mga resipyente sang P3,000 kag groceries nga gikan kay Senator Bong Go nga ginpaagi sa DSWD, bangud antes pa ang event, nagpakig-angut na sa barangay level kag ginhambalan nga impormahon ang mga vendors nga resipyente nga sundon kag ipatuman ang health protocols labi na ang social distancing.
Gin-organisa man ang tanan pinaagi sa paghatag sang numero agud indi sila magkadto sa venue kun wala pa ang ila turno.
Bangud duna na sa mga Filipino nga basta may grasya ukon bulig nga mabaton, apisar nga indi pa nila turno, nagakadto na sila sa pagkabalaka nga indi sila mahatagan kun maulihi.
Apang ginpahayag ni Canto nga matapos nakalab-ot sa ila ang wala pag-obserbar sang social distancing protocol, gilayon sila nagpakig-agut sa ila mga personnel nga yara sa venue nga amo ang nagpahanumdum sa mga vendors nga magdistansiya sa isa kag isa.
Ginkunsidera man sang grupo ang sistema nga batch ukon clustering sa pagpanagtag sang ayuda, apang bangud na-schedule na ang event kag yara na ang pondo kalakip ang mga staff ni Senator Bong Go, rason nga gindayon na lamang.
Pananglitan nga ipaiway ang nasambit nga event kag padayon nga magtaas ang kaso sang COVID-19 kag madesisyunan nga ipaidalum sa pila ka mga restriction, ma-delay naman ang pagbaton sang mga vendors sang ayuda.
Samtang ginkumpirma ni Canto nga may pila ka mga banwa nga ginpainan sang pondo nga ginpaiway ang distribusyon kalakip diri ang Dumarao, Dumalag kag President Roxas, nga mataas ang kaso sang COVID-19.
