ROXAS CITY – Sa natapos lang nga imbestigasyon sa pagpanguna ni Board Member Thea Faith Reyes nga amu ang Chairman sang Committee on Education, natukiban sini nga naubos na ang tunga sang pondo para sa scholarship program sang gobyerno probinsyal.
Suno kay BM Reyes, 9 milyon na ang nabuhin sang nakaligad nga administrasyon sa 20 milyon nga pondo.
Wala man suno diri may ginbilin nga opisyal nga dokumento agud matsekyar ang pangalan kag mapamatud-an nga nakapasar ang mga scholars sa exam kag interview.
Gintuad ni BM Reyes nga ang may responsibilidad agud magbilin sang dokumento amu si Robelle Villasoto nga anay Scholarship Head Secretariat nga gindesignar sang Scholarship Committee kun sa diin tagpamuno sini si anay Governor Nonoy Contreras.
Bangud sini, ikapila sila nakig-angut kay Villasoto apang isa ka beses lamang ini nagpakita kag ginpahayag wala may mahatag nga dokumento ukon listahan sang scholars bangud nadula ang iya USB kag nawasak ang laptop.
Ginkadismaya naman ini ni Reyes kag ginakabig iresponsibilidad ni Villasoto bangud indi lamang kuwarta suno diri ang gina-istoryahan kundi ang buwas damlag sang mga kabataan.
Bilang aksyon sa mga iregularidad, nakighinun-anon si BM Reyes sa provincial legal office kag nagpapasar sang resolusyon agud masuguran kag mahibaluan kun ano ang kaso nga mahimo ipasaka sa mga naulamid nga indibidwal kag mahatagan hustisya ang mga iskolar sang probinsya.
Ginapasalig man sini nga ang bag-o nga scholarship program ang mangin klaro, wala sang itago, wala pamolitika kag wala sang pinilianay.
