ROXAS CITY – Nagapadayon ang hugot nga pagpatuman sang health border checkpoint sa boundary sang Balijuagan-Ivisan kun sa diin maid-id nga gina-tsekyar ang mga indibidwal nga nagasulod sa siyudad sang Roxas bilang kampanya batuk sa coronavirus disease (COVID-19).
Ini ang ginpahayag ni Police Staff Sergeant Felipe Firmo sang Roxas City Police Station sang mainterview sang Bombo Radyo.
Ginpahayag sini nga kaupod sang mga kapulisan ang mga Barangay Health Workers kag mga barangay officials.
Suno sa opisyal, talalupangdon ang malaka na nga pag-alabutan sang mga tawo sa siyudad kun ikomparar sang nakaligad nga mga inadlaw.
Mahibaluan nga antes makasulod ang mga indibidwal sa siyudad sang Roxas, gina-tsekyar ang ila nga temperature gamit ang thermal gun scanner.
Pananglitan mataas ang temperature sang isa ka persona, ginapapahuway anay ini kag tsekyaron liwat.
Sa liwat nga pagtsekyar kag mataas gihapon ang temperature sang isa ka persona, gilayon nga nagatawag sang emergency responders agud madala sila sa ospital.
Magluwas diri, ginapafill-up man sang form ang mga nagasulod sa siyudad kun sa diin ginasulat sang mga ini ang ila pangalan kag gina-usisa ang mga ini kun may history of travel sila sa mga lugar nga infected sang COVID-19.
Kun may history of travel ang isa ka persona sa mga lugar nga infected sang amo nga virus, iga-hold ang mga ini kag iga-rekomendar sa pagpaidalom sa quarantine.
Mahibaluan nga nagapanagtag man sang flyers sa amo nga lugar bilang pag-edukar sa publiko sa kun ano ang dapat himuon ilabi na sa pagpabakod sa immune system batuk sa nasambit nga balatian.
