Nagpaandam ang isa ka health expert sa publiko nga hatagan sang nagakaigo nga pag-atipan ang mata kag indi pagbalewalaon ang mga sintomas nga mahimo magpabutyag sang mas seryoso nga problema sa panan-aw.
Sa interview sang Bombo RAdyo kay Dr. Markmarie Gaile M. Ardivilla, Optometrist sang Roxas Memorial Provincial Hospital, iya ginpahayag nga importante ang regular nga pagpa-check-up sang mata, ilabi na sa mga nakabatyag sang paglabo sang panan-aw, kasakit, kapula, ukon iban pa nga indi na normal nga sintomas.
Suno kay Ardivilla, ang epekto sang sobra nga paggamit sang cellphone kag computer, ilabi na ang pagtan-aw sa screen sa madulom nga palibot antes matulog ang mahimo magresulta sa eye strain kag discomfort.
Pahayag pa niya, indi basta-basta maggamit sang over-the-counter eye drops ukon tradisyonal nga remedyo para sa kapula sang mata, bangod mahimo ini magpalala sang kondisyon ukon makatabon sa sintomas sang mas seryoso nga sakit sa mata.
Dugang pa sang natungdan, himuon nga prayoridad ang eye care kag indi maghulat nga maglala anay ang problema antes magpakonsulta, bangod ang pag-atipan sa mata isa ka importante nga tikang sa pagpreserbar sang panan-aw.
