Nagpaandam ang isa health expert nga mangin mabinantayon sa mga senyales sang scoliosis agud malikawan ang paglala sang kondisyon.
Sa interview sang Bombo Radyo kay Dr. Maricris Villarosa, Physiatrist sang Roxas Memorial Provincial Hospital, iya ginpahayag nga ang scoliosis isa ka kondisyon kun sa diin may indi normal nga pagkakurba ang spine ukon gulugod sa kilid nga daw kaangay sang letra nga “S” ukon “C”.
Suno kay Villarosa, ini ang masami nga madiskubrehan sa mga kabataan kag mga teenager samtang padulong sila sa adolescent age.
Pahayag pa niya, importante ang early detection bangud mahimo maglala ang kondisyon kon indi matutukan sang nagakaigo nga pagtamod kag pagbulong.
Nagpanawagan man ang natungdan nga mangin aligmat sa ikaayong lawas agud malikawan ang pag-angkon sang pila ka mga sakit ukon komplikasyon.
