Nagpaandam ang isa ka Health Expert sa mga malain nga epekto sang pagpanigarilyo kag e-cigarrette kaangay sang vape.
Sa interview sang Bombo RAdyo kay Dr. Fadzree Tandoc, Medical Officer III sang Mambusao, District Hospital, iya ginpahayag nga ang pagpanigarilyo ang nagapabilin nga isa sa mga nagapanguna nga rason sang kamatayon sa bug-os nga kalibutan bangud nagaresulta ini sa mga malala nga balatian kaangay sang sakit sa tagipusuon, stroke, sakit sa baga, kag nagkalain-lain nga sahi sang cancer.
Suno kay Tandoc, mahimo man nga makabutang ang pagpanigarilyo sa katalagman indi lamang sa naga-sigarilyo kundi pati sa ila pamilya kag komunidad pinaagi sa secondhand smoke.
Pahayag pa sini, kadungan sang World No Tobacco Day, ginaduso man ang pagdili sang paggamit, pagbaligya kag pag-anunsyo sang mga produkto sang tabako sa sulod sang ospital, pagpatuman sang wala sang designated smoking area, kag regular nga paghatag sang mga lecture kag impormasyon sa mga pasyente sa Outpatient Department.
Dugang pa sang natungdan, nga mag-untat sa pagpanigarilyo para sa mas malawig kag maayo nga pagpangabuhi .
