Nagpahanumdom sa publiko ang isa ka health expert nga mas mangin mabinantayon sa mga ginakaon kag ginainom agud malikawan ang sakit sa kidney, kadungan sang pagselebrar sang National Kidney Month.
Sa interview sang Bombo Radyo kay Dr. Juncor Gamboa, Medical Specialist sa Internal Medicine-Adult kag Nephrology sang Sen. Gerardo M. Roxas Memorial District Hospital , iya ginpahayag nga ang National Kidney Month nagatuyo nga mapataas ang ihibalo sang publiko bahin sa importansya sang pag-atipan sang kidney kag sa paglikaw sang chronic kidney disease kag posible nga dialysis.
Suno kay Gamboa, ang mataas nga presyon sang dugo kag diabetes amo ang duha sa masami nga kabangdanan sang sakit sa kidney.
Gani, importante nga makontrol ang blood pressure kag blood sugar, rason nga ginarekomendar ang regular nga ehersisyo, pag-inom sang nagakaigo nga kadamuon sang tubig, paglikaw sa sobra nga maalat nga pagkaon kag indi pag-abuso sang bulong nga wala sang rekomendasyon sang doktor.
Pahayag pa niya, posible nga wala sang mabatyagan nga sintomas sa una nga bahin sang sakit sa kidney, gani importante ang regular nga kidney check-up ilabi na sa mga may family history sang nasambit nga sakit sa pamilya.
Nagpanawagan man ang natungdan nga mangin responsable sa ikaayong lawas agud malikawan ang seryoso nga komplikasyon kag mapabilin nga healthy ang kidney.
