Nagpahanumdom ang isa ka health expert sa importansya sang newborn screening agud ma-detect gilayon ang pila ka seryoso nga kondisyon sa mga lapsag nga mahimo magresulta sa komplikasyon kon indi matatapan.
Sa interview sang Bombo Radyo kay Dr. Myrene Therese Valdemar, medical specialist sa Senator Gerardo Roxas Memorial Hospital, iya ginpahayag nga ang newborn screening isa ka simple nga test nga ginahimo sa bag-o pa lang natawo nga bata agud mahibaluan kon may yara ini sang pila ka kondisyon nga mahimo indi makita dayon pinaagi lamang sa pisikal nga pag-examine.
Suno kay Valdemar, importante nga ma-screen ang bata sa husto nga tion bangod may mga kondisyon nga mahimo wala sang makita nga sintomas sa una, apang mahimo magresulta sa seryoso nga problema sa kahimsog ukon development sang bata kon indi mabulong.
Dugang pa sang natungdan, indi lamang gamay nga butang ang newborn screening, bangod ang early detection kag nagakaigo nga intervention mahimo makabulig sa paglikaw sang mas seryoso nga komplikasyon kag makahatag sang mas maayo nga kahigayunan para sa normal nga pagdaku kag pag-develop sang bata.
