CAPIZ – Nagpahanumdom ang isa ka health expert sa importansya sang pag-angkon sang ihibalo natuhoy sa mga neglected tropical diseases.
Sa interview sang Bombo Radyo kay Dr. Joevic Belasoto, Adult Infectious Disease Specialist sang Roxas Memorial Provincial Hospital, iya ginpahayag nga ang neglected tropical diseases amo ang mga balatian nga masami yara sa mga tropical kag subtropical nga lugar, ilabi na sa mga developing countries.
Ginatawag ini nga “neglected” bangud kulang ang atensyon, pondo, kag research nga ginahatag kun ipaanggid sa iban nga mas kilala nga balatian, bisan pa nga madamo ang gakaapektuhan sini nga mga tawo.
Suno kay Dr. Belasota, ang mga halimbawa sang neglected tropical diseases (NTDs) amo ang dengue, rabies, leprosy , schistosomiasis, filariasis, elephantiasis, kag soil-transmitted helminths ukon ginatawag nga bitos.
Pahayag pa niya,prone sa amo nga mga balatian ang mga pumulyto nga mga naga-istar sa rural areas, kag mga lugar nga kulang sang limpyo nga tubig kag maayo nga sanitation.
Para mapunggan kag makontrol ang neglected tropical diseases (NTDs), importante ang regular nga medical check-up, mass drug administration, pagpaninlo sang palibot, paggamit sang mosquito nets, husto nga sanitation, kag access sa limpyo nga tubig.
Nahibaluan nga subong nga bulan sang Enero ginadumdom ang World Neglected Tropical Diseases Day.
Dugang pa sang natungdan, importante ang early detection kag treatment agud malikawan ang komplikasyon kag paglapta sang nasambit nga mga balatian.
INTERVIEWED BY: BOMBO VINZ DEOCAMPO
