Nagpahanumdom ang isa ka Health Expert sa publiko sang pag-angkon sang ihibalo agud malikawan ang pagkalumos.
Sa interview sang Bombo Radyo kay Mr. Jay Agarrado, Nurse II sang Capiz Provincial Health Office, iya ginpahayag nga sa mga nagligad nga mga tuig, nagapadayon ang pagsaka sang kaso sang pagkalumos sa mga suba, dagat, kag swimming areas sa probinsya, kag masami nga biktima amo ang mga kabataan kag mga manugpangisda.
Suno kay Agarrado, mas ginpabakod sang Provincial Health Office ang Drowning Prevention Program pamaagi sa Provincial Ordinance No. 017, Series of 2026, nga nagatukod sang Provincial Drowning Prevention and Water Safety Program.
Pahayag pa niya, tinutuyo sang probisyon sang ordinansa amo ang water safety education, pagpasangkad sang No Swimming Zones, pagbutang sang trained lifeguards sa mga water recreation areas, first aid kag rescue training sa komunidad, kag proper monitoring kag reporting sang drowning cases.
Dugang pa sini, bantayan permi ang kabataan kun magpaligo sa dagat ukon swimming pools, indi maglangoy sa madalum kag delikado nga lugar, magsuksok sang life jacket kun magbiyahe sa bangka, sundon ang safety rules sang swimming area, kag kun may makita nga nalumos, magpangayo dayon sang bulig kag tawgon ang emergency responders samtang ginahulat ang rescue assistance.
