Nagpaandam ang isa ka health expert sa publiko nga indi dapat pagbalewalaon ang bisan gamay nga kagat sang ido ukon kuring bangud posible ini nga magdala sang rabies.
Sa interview sang Bombo Radyo kay Dr. Maria Saria G. De Tomas, Medical Officer III sang Tapaz District Hospital, iya ginpahayag nga ang pinakauna nga dapat himuon pagkatapos makagat ukon makalmot sang sapat amo ang gilayon nga paghugas sang pilas gamit ang sabon kag flowing water sa sulod sang 15 minutes, kag magpakonsulta gilayon sa health facility.
Suno kay De Tomas, indi dapat hulaton pa ang pila ka adlaw antes magpakonsulta kag indi man dapat butangan sang anuman nga sahi sang bulong ang pilas.
Ang rabies mahimo nga mapunggan paagi sa husto kag gilayon nga post-exposure treatment, nga nagalakip sang wound care, anti-rabies vaccine kag, kon kinahanglan, rabies immunoglobulin.
Gina-engganyo man sang natungdan ang mga tag-iya sang ido kag kuring nga mangin responsable sa ila mga sapat, lakip ang regular nga rabies vaccination kag paglikaw nga makakagat ini sang iban. Ginpaandaman man ang mga ginikanan nga tudluan ang kabataan nga indi magpalapit, magdulaan ukon magpakaon sang wala nila kilala nga sapat.
