Nagpahanumdom ang isa ka health expert sa publiko nga mangin mabinantayon batok sa mga W.I.L.D. Diseases ilabi na nga tion na sang tig-ululan.
Sa interview sang Bombo Radyo kay Dr. Jaypee Delfin Barbasan, Medical Officer III sang Tapaz District Hospital, iya ginpahayag nga ang W.I.L.D. Diseases amo ang nagkalain-lain nga balatian kaangay sang Waterborne and Food-borne Diseases, Influenza-like Illness, Leptospirosis kag Dengue.
Suno kay Barbasan, ang waterborne diseases pareho sang diarrhea, typhoid kag cholera makuha sa mahigko nga tubig kag pagkaon, kag ang influenza-like diseases nagalakip naman sang makalalaton nga ubo, sip-on kag hilanat.
Samtang ang leptospirosis naman ang mahimo makuha sa tubig-baha nga kontaminado sang ihi sang ilaga kag ang dengue naman ginadala sang kagat sang lamok nga Aedes aegypti nga nagapadamo sa stagnant water.
Pahayag pa niya, kinahanglan magpakonsulta gilayon kun makabatyag sang sintomas kaangay sang mataas nga hilanat, pagpangurog, sakit sang ulo kag lawas, ubo, sip-on, rashes, pagsuka, agud malikawan ang mas grabe nga komplikasyon.
Dugang pa sang natungdan, amligan ang ikaayong-lawas subong nga tig-ululan agud malikawan ang ano man nga sahi sang balatian.
