Nagpahanumdom ang health expert sa publiko nga ang suicide prevention indi lamang responsibilidad sang mga doktor kag mental health professionals kundi responsibilidad sang tanan.
Sa interview sang Bombo Radyo kay Dr. Rommil M. Longno, Medical Officer III sang Capiz Provincial Health Office, iya ginpahayag nga importante nga kabalo ang publiko magpamati, magpakita sang pag-atipan kag magbulig sa mga tawo nga nagaagi sang mabudlay nga tion.
Suno kay Longno, lakip sa mga warning signs nga dapat seryosohon amo ang pagpahayag sang isa ka tawo nga daw wala na siya sang rason para mabuhi, sobra nga hopeless, naga-isolate sa pamilya kag abyan, may daku nga pagbag-o sa mood, ukon nagasiling nga gusto na niya magpahuway sa tanan.
Apang ginpaathag niya nga indi dapat mag-assume nga suicidal na dayon ang isa ka tawo bangud sa isa lamang ka warning sign kag mas maayo nga tan-awon ang kabug-usan sang sitwasyon.
Dugang pa sang natungdan, importante ang empathy sa isa ka tawo nga nagakinahanglan sang bulig, bangud mahimo ini makahatag sang kahigayunan nga maistorya niya ang iya ginabatyag kag mabatyagan nga may tawo nga handa magpamati sa iya.
