Nagpahanumdom ang isa ka health expert sang importansya sang husto nga pagdumala, pagpreparar kag pagluto sang pagkaon agud malikawan ang mga balatian nga mahimo makuha halin sa pagkaon nga kontaminado ukon indi malimpyo kadungan sang pagsaulog sang Food Safety Awareness Week.
Sa interview sang Bombo Radyo kay Dr. Giselle S. Cabilitasan, Medical Officer III sang Sen. Gerardo M. Roxas Memorial District Hospital, iya ginpahayag nga daku ang mabulig sang kaalam parte sa food safety agud masiguro nga ang pagkaon nga ginakaon sang tagsa ka pamilya nga luwas para sa ikaayong lawas.
Suno kay Cabilatasan, likawan ang sala nga pagpreparar sang pagkaon, lakip na ang indi paghugas sang kamot antes magluto ukon magkaon, paggamit sang mahigko nga kagamitan, kag pagbutang sang hilaw nga karne, isda kag manok upod sa pagkaon nga luto na.
Pahayag pa niya, ang pagkaon nga kontaminado mahimo magresulta sa food poisoning nga may mga sintomas kaangay sang vomitting, sakit sang tiyan kag hilanat.
Nagpanawagan man ang natungdan sa publiko nga magreport sa nagakaigo nga lokal nga ahensya kon makakita sang mga baligya nga pagkaon nga ginadumalahan sa indi limpyo nga kondisyon.
