CAPIZ – Nagpahanumdom ang isa ka health expert natuhoy sa importansya sang pag-angkon sang ihibalo sa childhood cancer.
Sa interview sang Bombo Radyo kay Dr. Marilyn Castro, Pediatric Hematology-Oncolgy Speacialist sang Philippine Pediatric Society, iya ginpahayag nga ang masami nga sahi sang cancer sa kabataan amo ang leukemia, brain tumors, kag lymphoma.
Suno kay Castro, wala sang klaro nga rason ang kadam-an nga kaso sang childhood cancer, apang importante ang temprano nga detection sang mga sintomas kaangay sang wala gakadula nga hilanat, pagpangluya, madasig nga pagkaga-ob sang panit, bukol sa lawas, kag indi maathag nga kasakit sa ulo ukon mga tul-an.
Pahayag pa niya,ang pamaagi sang bulong naga-depende sa klase kag stage sang kanser, kag mahimo malakip ang chemotherapy, radiation therapy, ukon operasyon.
Nahibaluan nga ginasaulog ang International Childhood Cancer Day, nga ginasaulog kada Pebrero 15 agud mapataas ang ihibalo nahanungod sa childhood cancer kag sa importansya sang early detection kag husto nga pagbulong.
Dugang pa sang natungdan, magbinuligay sa pagpalapnag sang impormasyon, pagsuporta sa mga programa para sa kabataan nga may cancer kag paghatag paglaum para sa mas maayong palaabuton.
INTERVIEWED BY: BOMBO VINZ DEOCAMPO
