CAPIZ – Nagpahanumdom ang isa ka health expert sa importansya sang paghalong sang tagipusuon.
Sa interview sang Bombo Radyo kay Dr. Rommel Mosquete, President sang Philippine Heart Association Capiz-Aklan Chapter, iya ginpahayag nga nagapanguna nga modifiable risk factors sang sakit sa tagipusuon amo ang pagpanigarilyo kag mataas nga kolesterol, kag ang non-modifiable risk factors naman amo ang diabetes kag hypertension.
Suno kay Dr. Mosquete, importante man ang pag-atipan sang tagipusuon ilabi na sa kababaihan nga nagalab-ot na sa menopausal age tungod sang natural nga pagbuhin sang estrogen, nga amo ang nagaproteher sang cardiovascular system.
Pahayag pa niya, magkaon sang masustansya nga pagkaon, regular nga ehersisyo, paglikaw sa sigarilyo kag sobra nga alkohol, husto nga tulog, kag stress management, agud mapabilin nga himsog ang tagipusuon.
Nahibaluan nga subong nga bulan sang Pebrero, ginaselebrar ang National Heart Month sa Pilipinas agud pasanyugon ang ihibalo kag kampanya batok sa mga balatian sang tagipusuon.
Nagpanawagan man ang natungdan sa publiko nga halungan ang tagipusuon samtang bata pa agud indi maka-angkon sang bisan ano nga balatian nga mahimo maka-utas sang kabuhi.
INTERVIEWED BY: BOMBO VINZ DEOCAMPO
