ROXAS CITY – Dako ang nabulig sang pagpabakuna sang COVID-19 vaccine, agud mapanubo ang nagapositibo sa nasambit nga virus, sa Capiz.
Sa interview sang Bombo Radyo kay Dr. Ramon Alex Nolasco, OIC sang Capiz Provincial Health Office, ginpahayag sini nga sa karon amat-amat nga nagnubo ang Healthcare Utilization Rate (HCUR) sa probinsya sa 30%.
Nagakahulogan nga naga-amat-amat gamay ang mga na-admit bangud sa COVID-19.
Sa pinakaulihi nga datos sang ahensya, may yara sang 52 ka mga aktibo nga kaso sang nasambit nga balatian, kun sa diin, 35 diri ang may mild symptoms, 12 ang asymptomatic kag 5 ang moderate.
Sa nasambit nga numero, 24 diri ang naka-home quarantine, 25 admitted sa ospital kag 3 ang yara sa facility quarantine.
Panugyan ni Nolasco nga kun mahimo ang mga nagapaidalom sa home quarantine ang magpaidalom sa facility quarantine agud nga malikawan ang posible paglapta sang balatian.
