Ginpaisol sang Pre-Trial Chamber I sang International Criminal Court (ICC) ang natalana nga hearing para confirmation of charges batuk kay anay Presidente Rodrigo Duterte nga una nga gintalana sa Setyembre 23, 2025.
Ang nasambit nga desisyon ang nagtulod sa hingyo sang kampo ni Duterte nga i-postpone ang hearing bangud sa ila pahayag nga indi siya “fit to stand trial” ukon indi na makatambong sa trial bangud sa kondisyon sang iya ikaayong lawas.
Suno sa ICC, ginpatuman ang limitado nga postponement agud hatagan sang kahigayunan nga masolbar ang nasambit nga request kag iban pa nga may kaangtanan nga mga butang.
Samtang, nagpaguwa naman si Judge María del Socorro Flores Liera sang isa ka dissenting opinion, nga nagapamatok sa pag-isol sang hearing.
Madumduman nga gindakop si Duterte sang Marso 11, 2025, may kaangtanan sa mga kaso sang krimen batok sa katawhan, lakip na ang pagpatay, pagpaantos, kag pagpanglugos, nga ginaalegar natabo sa idalom sang iya pagpanguna sa Davao City kag sa tion sang iya administrasyon bilang Presidente sang Pilipinas.
Ang katuyuan sang pagbista sa kumpirmasyon sang mga panumbungon amo ang pagdeterminar kon bala may bastante nga ebidensya sa pagpadayon sang kaso sa hugna sang pagbista.
Sa tion nga makumpirmar ang mga panumbungon, ang kaso igasaylo sa Trial Chamber para sa pormal nga pagbista
