ROXAS CITY – Nagdangat sa kapin 125 degrees Fahrenheit (125 °F) mas mataas sa 100°F predicted nga temperatura, subong nga bulan sang Hulyo, sa pila ka bahin sang Central United States.
Ini ang ginpakigbahin ni Bombo International Correspondent (BINC) Mr. Rufino ‘Pinoy’ Legarda Gonzales, direkta sa Texas, USA, sang mainterview sang Bombo Radyo.
Kun i-convert sa degrees celcius ang nasambit nga kainiton sa Central part sang US, nagadangat ini sa kapin 50°C, mas mainit sa narekord nga pinakamainit nga temperatura sa Pilipinas nga masobra sa 40°C.
Bangud sini, suno kay Gonzales nga wala nagaguwa ang mga Amerikano sa ila mga puloy-an agud malikawan ang heatstroke, kun sa diin may yara na sang napagkit nga datos sa ila lugar nga napatay bangud sa nasambit nga balatian.
Ginkumpirmar man sini nga may yara sang wildfire nga nagakahinabo sa bahin sang Dallas, Texas, kun sa diin kapin 2,000 hectares ang apektado nga lugar.
Nahibaluan nga subong nga tiyempo, naga-eksperyensiya sang summer season ang US, kag ginalauman nga magadugay pa ini tubtob sa bulan sang Agosto.
