Balik operasyon na subong nga Sabado, Marso 22 ang Heathrow Airport sa London matapos ang power outage bangud sa dako nga sunog sa kaiping nga electrical substation nga naka-atrasar sa biyahe sang masubra 200,000 pasahero.
Suno sa British Airways, 8 sa ila nga delayed flights ang nakahalin na sa Heathrow airport sini nga gab-i sang Sabado.
Apisar suno sa UK flag carrier, ginlauman nga maga-operate ini sa 85% capacity pa subong nga Sabado kag nag-abiso sa mga pasahero nga lauman ang pagkadelay sa ila nga flights sa mga masunod nga adlaw.
Ang Air Canada naman kag United Airlines ang gin-anunsiyo man ang pagpadayon sang ila nga scheduled flights padulong kag paghalin sa Heathrow airport sini nga gab-i sang Sabado.
Una na diri, suno sa London Fire Brigade (LFB), natabo ang sunog sa isa ka transformer nga naga-unod sang 25,000 litro sang cooling fluid.
Bilang resulta, masubra 65,000 ka puluy-an sa lugar ang nadulaan sang suplay sang kuryente kasubong man ang paluparan.
Nagpatigayon naman sang imbestigasyon sa nangin rason sa nasambit nga sunog nga nakatutok sa electrical distribution equipment.
Ang Heathrow airport nga amo ang pinakadako nga aviation hub sa United Kingdom kun sa diin nagdangat sa 83.9 milyon nga pasahero ang napagkit sa paluparan sadtong nakaligad nga tuig.
