ROXAS CITY – Nagahilibi-on nga gindepensahan sang 45-anyos nga helper ang iya kaugalingon batuk sa alegasyon nga isa ini sa mga ginaalegar nagpangawat sang masobra P800K balor sang alahas kag P50,000 cash sa balay sang anay amo nga si Etheline Villareal, 64-anyos sa Barangay Cogon, Roxas City.
Sa pagpakig-angut sang Bombo Radyo Roxas kay Marlyn Ortega, isa sa mga ginatudlo suspek, ginpanginwala sini ang akusasyon kag ginpahayag nga wala sang may ginkawat, wala sila nag-pangawat kag wala sila nagpalagyo kundi ginapatu-patuan lamang sila sang ila anay gina-ubrahan.
Sa panaysayon ni Ortega, iya gin sapupo si Editha Alejandro ang kabulig sang iya anay amo bangud nag angkon ini sang bukol tuga sang ginaalegar pagsakit sang driver ni Villareal kag posible ginkaakig sini bangud ginreklamo sang kabulig ang natabo rason nga pati ini ang nadalahig.
Dugang pa ni Ortega, nga masami ginapakalain sang ila anay amo ang mga tinawo sini nga nagahalin sa iya.
Luyag naman sini nga limpyuhon ang iya pangalan bangud apektado na ang iya trabaho tuga sang krimen nga wala matabo kag wala sini ginbuhat.
Matandaan sa reklamo ni Villareal ginaalegar nga ka-kuntsaba si Ortega kaupod si Wilfredo Alado, 46-anyos sang iya kabulig sa balay nga si Editha Alejandro, 46-anyos nga ginaalegar suspek sa pagpangawat sang masobra P800K balor sang alahas kag P50,000 cash sa sulod sang iya balay.
Natalana nga ipa-barangay ni Ortega ang insidente kag luyag sini nga mag-public apology si Villareal.
