ROXAS CITY – Ginpasiguro sang hepe sang Philippine National Police (PNP)-Highway Patrol Group (HPG)-Capiz nga indi sila magpangdakup sa mga tricycle drivers nga nagaagi sa national highways sa sulod sang 30 diyas samtang nagahimo sang pamaagi ang gobyerno sang syudad nga makakuha sang exemption sa Department of Interior and Local Government (DILG) kasunod sang Memorandum Circular 036-2020.
Ini ang ginpahayag ni Police Chief Master Sergeant Iluminado Piña sang ma-interview sang Bombo Radyo Roxas.
Suno kay Piña nga nag-apelar ang alkalde sang syudad nga hatagan sang exemption nga 30 diyas ang mga tricycle drivers samtang ginabalay ang alternative route plan sa syudad sang Roxas.
Bangud diri, indi dapat nga magkahadlok ang mga tricycle drivers kun makita nila ang mga katapo sang HPG sa dalanon kun wala man sila sang may ginalapas nga traffic rules.
Katuyuan karon sang HPG ang magpatigayon sang information dissemination angot sa MC 036-2020 sang DILG agud sa tion nga magtakup na ang 30 diyas ma-intindihan na sang mga tricycle drivers ang nasambit nga layi.
Apang ginapanindugan ni Piña nga humalin sang ginpapanaog ang memorandum circular 036-2020 sang DILG may yara na sang mandu nga ila dakpon ang mga tricycle drivers nga nagalabay sa national highways.
Ginpahayag ni Piña nga wala sang may mahimo ang HPG bangud nagasunod lamang sila sa mandu sang DILG sa diin ginapangitaan sila sang report ukon accomplishments.
