Ginsiguro sang hepe sang Ivisan Municipal Police Station nga padayon nga mapabilin ang kalinong kag katawhay sa banwa paagi sa mas hugot nga pagpatuman sang mga polisa batok sa kriminalidad kag iban pa nga ilegal nga aktibidad.
Sa interview sang Bombo Radyo Roxas kay PMAJ. Rile Villariez Jr., hepe sang Ivisan Municipal Police Station, iya ginpahayag nga daku ang iya pagpasalamat sa kooperasyon sang mga pumuluyo kag sang tanan nga police personnel nga nagabulig sa pagpabilin sang malinong kag matawhay nga komunidad.
Suno kay Villariez, padayon sa gihapon ang ila kampanya batok sa kriminalidad, iligal nga druga, mga wanted person kag iligal nga armas.
Pahayag pa niya, padayon man ang police visibility sa nagkalain-lain nga bahin sang banwa agud mapabaskog ang seguridad kag malikawan ang mga insidente sang krimen.
Nagpasalamat man si Villariez sa promosyon nga iya nabaton bilang Police Major.
Nagpasalig siya nga magapadayon ang patas, matutom kag dedikado nga pagserbisyo sa katawhan sang Ivisan agud mapadayon ang pagsalig sang publiko sa mga kapulisan.
