Ginkumpirma sang Capiz Police Provincial Office (CPPO) nga ginpaidalom sa administrative relief si Police Captain Mark Ryan Garcia, hepe sang Pontevedra Municipal Police Station, kag ang commander sang 1st Capiz Provincial Mobile Force Company.
Ini kasunod sang nagluntad nga shooting incident sa isa ka KTV bar sa Brgy. Binuntucan, Pontevedra, Capiz.
Sa interview sang Bombo Radyo kay Police Major Rachelle Garnica, Public Information Officer sang CPPO, iya ginpahayag nga ang amo nga tikang ginbase sa command responsibility, ilabi na sa posible nga kakulangan sa implementasyon sang Oplan Bakal kag iban pa nga police security measures sa lugar, samtang nagapadayon ang imbestigasyon sa insidente.
Matandaan nga napatay si Police Captain Rian Ampoyos sang 3rd Platoon, 1st Capiz Provincial Mobile Force Company matapos nga ginluthang sang isa ka suspetsado sa sulod sang isa ka KTV bar sa amo nga banwa.
Suno pa kay Garnica, si Police Captain Maria Fe Tipaz Umiten ang gintalana nga Officer-in-Charge sang Pontevedra Municipal Police Station bilang bulos kay Police Captain Garcia, samtang si Police Major Alfred V. De Leon naman ang magaserbe bilang Officer-in-Charge sang 1st Capiz Provincial Mobile Force Company.
