CAPIZ – Ginkumpirma ni Capiz Police Provincial Office (CPPO) Officer-In-Charge Police Colonel David Cachumbo Jr. nga temporaryo nga i-relieve sa pwesto si Police Captain Mark Anthony Garcia bilang hepe sang Pontevedra Municipal Police Station.
Ini matapos nga ginluthang-patay sa KTV Bar sa Barangay Binuntucan, Pontevedra, Capiz si Police Captain Rian Ampoyos, myembro sang First Capiz Provincial Mobile Force Company.
Sa interview sang Bombo Radyo kay Cachumbo, iya ginpahayag nga ang nasambit nga tikang ang kasunod sang rekomendasyon sang Chief of the Regional Staff kag Deputy Regional Director for Operations bangud sa ginaalegar kapaslawan sa pagpatigayon sang Oplan Bakal, isa ka police operation nga nagasakop sang inspeksyon sa mga establisyemento, ilabi na sa mga bar kag nightclub, agud masiguro nga wala sang armas nga ginadala ang mga customer.
Suno kay Cachumbo, may yara na sang ginarekomendar nga posible nga magabulos sa pwesto ni Garcia, apang wala pa ini ginpangalanan.
Sa subong, wala pa sang petsa kun san-o mangin epektibo ang iya temporaryo nga administrative relief.
