ROXAS CITY – Ginpanginwala sang Hepe sang Roxas Memorial Provincial Hospital (RMPH) ang ginpalab-ot nga reklamo sang pila ka empleyado nga ginaalegar gina-terminate ang mga ini agud pataasan ang suweldo sang iban nila nga kaupdanan sa trabaho.
Sa interview sang Bombo Radyo kay Dr. Florencio Luching, ginpahayag sini nga nakapataas na sang suweldo sa tanan nga mga regular nga empleyado, subong man wala na sang job order nga mga nurses sa probinsya kag ginhimo na sila nga contractual nga may fixed nga suwledo sa P20,000 monthly sa tanan nga pampubliko nga ospital sa Capiz, sumugod sang nagpungko si Governor Fredenil ‘Oto’ Castro.
Dugang pa ni Luching, sa bahin sang District Hospital nga ginpahayag may nagakahinabo nga pagpahalin, indi termination ang tawag diri kundi wala sila gin-renew bangud posible sa ila malain nga pamatasan, bangud objective sa karon sang administrasyon ni Castro nga basehan sa ila renewal amu ang ila performance kag pamatasan.
Sa bahin sang RMPH, wala paman suno diri sang napahalin, apang under observation ini nga pagsulondan kag posible nga ipatuman kun wala gid sang pagbag-o ang pamatasan sang pila ka empleyado.
Gani, kun approachable, indi suplada/suplado, maayo ang pagtatap sa mga pasyente, wala sang rason nga ma-terminate ang isa ka empleyado sang District Hospital ukon RMPH.
Sa karon, may yara sang kapin 500 ka mga empleyado ang RMPH kag 50 lamang diri ang regular.
Aminado man si Luching nga ginakulang sa karon sang nurses ang RMPH bangud may pipila nga nag-voluntary resigned bangud ang iban magatrabaho sa luwas sang pungsod samtang ang iban nagpangita sang mas naluyagan nila nga trabaho.
Mensahe sini sa mga empleyado sang ospital nga magtrabaho sang insakto kag pakaayuhon ang pamatasan, kag sa mga may indi nanamian sa empleyado ukon sa ospital, magpadulong sa iya opisina sa baylo nga una magpalab-ot sa media.
