ROXAS CITY -Liwat nagpahanumdum ang hepe sang Roxas City PNP sa publiko sa pagtuhaw sang panibag-o nga double your money investment scheme sa syudad sang Roxas kag kabanwahanan sa probinsiya sang Capiz.
Ginpahayag ni Police Lt. Col. Ricardo Jomuad Jr., matapos nakumpirma ang pagpamayagpag sang 28 days double your money investment scheme, nagpakig-angut ini sa Securities and Exchange Commission (SEC) nga nagpalab-ot sang impormasyon nga wala sang permiso kag wala naka-rehistro sa talatapan ang nasambit nga investment company.
Nagaguha sa impormasyon nga wala sang permanente nga opisina ang nasambit nga investment company sa diin may yara sa Panay kag sa Roxas City.
Nagtuhaw man ang pangalan sang pila ka upline ni Chiyuto sa double your money scheme nga nagapang-kumbinse sang mga investors nga mag-invest sa karon.
Ba-se sa impormasyon nga sang nagligad nga bulan sang Pebrero nagsugod ang 28 days double your money kag ginakabalak-an nga may ma-biktima naman sila liwat, kun indi matapna.
Nahibaluan nga agud makaganyat sang mga investors, kada adlaw nagahatag sang payout.
Nag-apelar sa publiko si Jomuad nga mangin alerto kag indi gilayon maghatag sang kuwarta kag mag-invest sa indi lehitimo nga kumpaniya agud indi magkadto sa wala ang ginpangabudlayan ukon hard earned money.
Nagpangabay man ini sa mga katapo sang media nga buligan sila nga mga pulis sa pagpalapnag sang impormasyon angut sa iligal nga operasyon sang 28 days double your money investment scheme agud wala na sang matuntuhan kag mabiktima nga mga pumuluyo.
