ROXAS CITY, CAPIZ- Nagbaton sang dako nga pasidungog ang Roxas City Police Station matapos nga ginpasidunggan si Police Lieutenant Colonel Ricardo B. Jomuad Jr. bilang National Outstanding Police Community Affairs and Development (PCAD) Junior Police Commisioned Officer sa bug-os nga pungsod.
Ang amo nga pagkilala ang bunga sang madinalag-on nga pagpatuman sang Project AMOMA, isa ka bag-o nga estratehiya sa community policing.
Sa interview sang Bombo Radyo Roxas kay Police Master Sergeant Mary Grace Jacinto, Focal Person sang Project AMOMA sang Roxas City Police Station, iya ginpahayag nga ang kadalag-an sang Project AMOMA ang isa ka pamatuod nga epektibo ang koordinasyon sang kapulisan sa mga komunidad, labi na sa mga malayo nga lugar.
Ang Project AMOMA, nga ang buot silingon ‘Aton Mangunguma, Mangingisda kag Mamumugon Organisahon, Manggad nga Dapat Amligan (Organizing Farmers, Fisherfolk, and Peasants: Our Resources to be Protected)’, ang nagapkita sa bag-o nga porma sang serbisyo-publiko kun sa diin aktibo nga kabahin ang mga mangunguma, manugpangisda, kag mga katapo sa pagdumala sang kalinong kag kaumwaran.
Suno kay Police Master Sergeant Jacinto, ang proyekto ang kabahin sang mas malapad nga Revitalized-Pulis sa Barangay (R-PSB) program nga may katuyuan nga pabaskugon ang presensya sang kapulisan sa mga geographically isolated kag disadvantaged areas (GIDAs).
Pamaagi sa nasambit nga programa, nagakahaw-as ang antas sang pangabuy-anan, seguridad sa pagkaon, kag pagsalig sang mga residente sa kapulisan.
Ginpakigbahin man ni Jacinto nga may pila ka mga barangay nga anay problemado sa insurhensiya kag kriminalidad, apang sa karon mas maayos na ang sitwasyon bangud sa proyekto.
Ang kadalag-an ni PLtCol. Jomuad Jr. sa pungsodnon nga lebel ang nagaserbe nga inspirasyon sa iban pa nga yunit sang pulisya sa rehiyon kag sa bug-os nga pungsod. Katuyuan sa karon sang Roxas City Police Station nga palawigon pa ang proyekto kag ganyaton ang iban pa nga mga probinsya nga ilugon ang modelo sang Project AMOMA.
Interviewed by Bombo Daren Salomeo Henson
