ROXAS CITY- Ginpabutyag sang librarian sang Capiz State University kag heritage advocate nga si Christian George Acevedo nga ang pagsaulog sang National Heroes Day indi lamang dapat mangin pagdumdom sa mga ngalan nga yara sa mga libro sang kasaysayan, kundi isa man ka tion agod kilalahon kag ipadayon ang mga leksyon kag prinsipyo nga ginbilin sang mga nagserbisyo para sa pungsod.
Suno kay Acevedo, importante nga maintindihan nga wala pa sang Filipino nga opisyal nga ginproklamar sang gobyerno bilang “national hero” pinaagi sa isa ka balaod, executive order ukon presidential proclamation. Bisan pa sini, nangin bayani sa mata sang publiko sanday Dr. Jose Rizal, Andres Bonifacio kag iban pa nga prominenteng personalidad bangod sa ila mga kontribusyon, sakripisyo kag daku nga impluwensya sa paghulma sang kasaysayan sang Pilipinas.
Ginpaathag man ni Acevedo ang papel sang National Heroes Committee nga gintukod sang 1993 sa idalom sang Executive Order No. 75, nga may katuyuan nga mag-evaluate kag magrekomendar sang mga Filipino nga dapat kilalahon bilang national heroes. Apang bisan pa may yara sang amo sini nga proseso, wala ini nagresulta sa isa ka pormal kag final nga deklarasyon sang gobyerno nga naghatag sang opisyal nga titulo nga “National Hero” sa mga ginrekomendar nga historical figures.
Sa pag-localize sang pagdumdom sang kabayanihan, ginpahayag ni Acevedo nga may mga historical figures kag bayani sa Capiz nga dapat mas makilala sang mga Capiznon bangod sa ila mga kontribusyon sa lokal kag national history. Para sa iya, indi dapat magtapos sa mga monumento, selebrasyon ukon ngalan sa libro ang pagpreserbar sang ila mga istorya.
Ginkilala man niya nga isa sa mga kabangdanan ngaa may mga historical figures nga indi na masyado kilala sang present generation amo ang pagbag-o sang interes kag pamaagi sang pagkat-on sang kabataan, amo nga kinahanglan nga mangin mas aktibo ang mga eskwelahan, cultural workers, historians kag komunidad sa pagdokumento kag pagpaabot sang lokal nga kasaysayan sa mas accessible nga pamaagi.
Sa sini nga National Heroes Day, ginpahanumdom ni Acevedo nga ang pagka-bayani indi lamang limitado sa mga ngalan nga yara sa history books. Mahimo man ini makita sa mga ordinaryo nga tawo nga nagahatag sang ila tion, kusog kag kabuhi para sa kaayuhan sang komunidad kag pungsod—kag ang pagkilala sa ila mga istorya amo ang isa sa mga paagi agod magpadayon ang kahulugan sang kabayanihan sa masunod nga henerasyon.
