ROXAS CITY, CAPIZ- Maisog nga ginpanindugan sang kilala nga geopolitical scientist nga si Richard Heydarian nga ang iya nangin pahayag angut sa Korte Suprema ang base sa mga “verifiable fact” kag ginakabig nga kabahin sang isa ka hilway nga pampubliko nga diskurso, kasunod sang kaso nga indirect contempt nga gin-file batok sa iya sang mga Pro-Duterte nga abogado.
Ang nasambit nga kaso ang gin-file nanday Atty. Rolex Suplico, nga sa karon Board Member sang 5th District sang Iloilo, kag Atty. Mark Tolentino, nga lunsay kilala nga taga-suporta ni anay Presidente Rodrigo Duterte.
Sa eksklusibo nga interview sang Bombo Radyo Roxas, gin-athag ni Heydarian nga ang iya nga pahayag sa social media hanungod sa pag-appoint sang 13 sa 15 ka mga mamalidha sang Supreme Court sa dalom sang administrasyon ni Duterte ang isa ka simple nga factual statement nga mahimo mapamatud-an kag indi kinahanglan nga kabigon nga isa ka pagpakamalaot.
Kaupod ang iya nga legal counsel nga si Atty. Dino de Leon, nag-file sila sang Comment/Opposition kun sa diin ginkwestiyon nila ang basehan sang reklamo kag ginpakamalaot ang paggamit sang ginaalegar indi nagakadapat nga jurisprudence sang mga petitioner. Ginsiling man sang mga ini nga kinahanglan man nga mag-esplikar ang mga nag-file sang kaso kun ngaman indi sila kinahanglan nga magpanabat sa contempt of court.
Ginhatagan pagtamod ni Heydarian ang importansya sang hilway nga pagtalakay sa mga pungsodnon nga isyu bilang pundasyon sang isa ka naga-gana nga demokrasya.
In an interview with Bombo Francis Biñas
