Indi bastante ang matag-as nga mga grades kag ang pagpasar sa mga examination agud maa-graduate sa isa ka High School sa Changhua County, Taiwan.
Sa Ershui Junior High School, ang mga estudyante may yara sang pinasahi nga katapusan nga kinahanglanon antes nila makuha ang ila diploma: dapat sila anay magsaka sa isa ka rock climbing wall nga may kataason sang lima ka panalgan nga building.
Ang pader ang may kataason nga 15 meters kag ginakabig nga pinakamataas nga climbing facility sa sulod sang isa ka eskwelahan sa bug-os nga Taiwan.
Katuyuan sini indi lamang nga testingan ang pisikal nga kusog sang mga pamatan-on, kundi pati man ang ila pokus, balanse, kag kaisog sa pag-atubang sa kahadlok.
Apisar nga makahaladlok ini sa kalabanan, apang basic nalang ini sa mga estudyante sang Ershui.
Madamo sa ila ang nanamian sa hangkat kag ginahimo pa gani ini bilang isa ka bonding activity upod sa ila mga ginikanan kada weekend.
Apang klaro ang pagsulundan, kon indi ka makasaka sa ibabaw, indi pag-ihatag ang imo diploma.
