Arestado ang isa ka High Value Individual (HVI) matapos nga nakuhaan sang ginapatihan shabu kag armas-luthang sa ginpatigayon nga buy-bust operation sa Barangay Tacas, Pontevedra, Capiz.
Ang subject person amo si alyas “Alfon”, 55-anyos kag residente sang nasambit nga lugar.
Sa interview sang Bombo Radyo kay Police Captain Dennis Losbañes, Officer-in-Charge sang Pontevedra Municipal Police Station, iya ginpahayag nga natigayon nga nadakpan ang amo nga persona pamaagi sa isa ka pulis nga nagpakuno-kuno poseur-buyer.
Nakuha sa paghinakop sini ang mas ukon menos 52 gramos sang ginapatihan shabu nga may estimated street drug price nga ₱353,600.00.
Nakuha man ang isa ka caliber .38 revolver kag tatlo ka mga bala sini, subong man ang buy-bust money nga gingamit sa operasyon.
Sa subong, nagapabilin ang nadakpan sa paghinakop sang Pontevedra Municipal Police Station para sa nagakaigo nga dokumentasyon kag pagpasaka sang kaso sa paglapas sa Republic Act 9165 ukon Comprehensive Dangerous Drugs Act of 2002 kag Republic Act 10591 ukon Comprehensive Firearms and Ammunition Regulation Act.
Interviewed by Bombo Vinz Lingco Deocampo | via Bombohanay sa Udto
