Bag-o lang hilway sa presuhan ang High Value Individual nga nadakpan sa drug buy-bust operation sa Barangay Dumulog, Roxas City.
Ang subject person ang ginkilala kay Jeric Clarito, 42-anyos kag residente sang nasambit nga barangay.
Sa interview sang Bombo Radyo kay Police Lieutenant Colonel Ricardo Jomuad Jr., Hepe sang Roxas Component City Police Station, iya ginpahayag nga natigayon nga madakpan ang subject person pinaagi sa gintingob nga pwersa sang Roxas City Police Station Drug Enforcement Team sa suporta sang Capiz Regional Intelligence Unit kag Philippine Drug Enforcement Agency-Capiz.
Suno kay Police Lieutenant Colonel Jomuad, ang suspek nakuhaan sang lima ka mga plastic sachets sang ginapatihan shabu nga may kabug-aton nga 350 grams kag may standard drug price nga Php 2,380,000.00 kag pila ka mga non-drug items.
Pahayag pa niya, nakahunong na sa istasyon sang Roxas Component City Police Station ang amo nga subject person para sa nagakaigo nga disposisyon.
Nagapanawagan man ang natungdan sang kooperasyon sang mga pumuluyo sang syudad sang Roxas nga kun may yara sang impormasyon nahanungod sa mga indibidwal nga involved sa iligal nga droga, ang ipakigbahin sa ila talatapan agud mapapas ang amo nga mga iligal nga hilikuton.
