ROXAS CITY – Patay ang isa ka lalaki matapos nga ginbuno sang ugangan takna 8:45 kagab-e sa Barangay Malitbog, Tapaz, Capiz.
Ginkilala ang biktima kay Orly Benerable Cornilio, 38-anyos, construction worker, kag residente sang Barangay Caridad, Jamindan.
Samtang ang suspek amu si Leopoldo Majadora, 56-anyos, mangunguma, kag residente sang nasambit nga lugar.
Sa nakuha nga impormasyon sang Bombo Radyo sa Tapaz Municipal Police Station, nagaguwa sa imbestigasyon nga, nag-abot sa balay sang iya ugangan ang biktima nga yara sa impluwensya sang makahulubog nga ilimnon kag nagtuga sang kinagamo.
Ginbadlong pa sang suspek ang iya umagad apang sa baylo nga magpati, nagpatunga ang mainit nga binaisay sa duha rason nga ginbuno ni Majadora si Cornilio sang makapila ka beses gamit ang kutsilyo kag madasig nga nagpalagyo sa wala matumod nga direksyon.
Bangud sini, nag-angkon sang patal nga pilas si Cornilio sa dughan kag liog nga nagresulta sang gulpi nga kamatayon.
Samtang, nagapadayon naman ang imbestigasyon sang kapulisan angut sa insidente.
