ROXAS CITY-Desidido nga magpasaka sang panumbongon ang mga himata sang duha ka mga persona batuk sa driver sang elf truck nga nakabunggo sa motorsiklo nga ginkamatay sang duha ka mga biktima sa Barangay Taft, Tapaz, Capiz.
Sa interview sang Bombo Radyo kay Police Staff Sergeant Rozher Garde ginpahayag sini nga ginpaidalom na sa Post Mortem ang bangkay sang mga biktima nga sanday Merlyn Catorce, isa ka retirado nga pulis kag residente sang Barangay Malitbog sa nasambit nga banwa kag Deoluden Carcillar, residente sang Calinog, Iloilo.
Base sa nakuha nga impormasyon sa Tapaz Municipal Police Station nga samtang ginasubay sang motorsiklo sang mga biktima ang dalanon sa lugar, aksidente ini nga nasanggit sang elf truck nga ginamaneho ni Conradelf Corros, 29 anyos sang Ungka, Pavia, Iloilo.
Bangud sa kabaskugon sang impact, nag-angkon sang mga kasamaran sa lawas ang mga biktima nga nagresulta sa ila kamatayon.
Gindala pa sa ospital ang mga biktima apang lunsay gindeklarar nga dead on arrival.
