Gintadlong sang talatapan sang City Disaster Risk Reduction and Management Office ukon CDRRMO ang alegasyon natuhoy sa pagpositibo sang babayi nga Locally Stranded Individual nga kun matandaan ginkuha ni Punong Barangay Einstein Okpora samtang ginapaidalom sa quarantine sa Congressman Ramon A. Arnaldo High School sa Barangay Banica, Roxas City.
Sa interview sang Bombo Radyo Roxas sa kay City Disaster Risk Reduction and Management-Officer Dennis Saneo, gintadlong sini nga ang nagpositibo amo ang himata sang nasambitan nga LSI nga may yara sang close contact sa nagpositibo man nila nga himata nga ginbawian na sang kabuhi.
Bangud sini, ginakabig na high-risk contact ang nasambitan nga LSI matapos nga naka close contact sini ang bag-o gid lamang nagpositibo sa amo nga balatian.
Natalana naman nga ipaidalom sa Real-Time Polymerase Chain Reaction ukon RT-PCR test ang nasambitan nga LSI.
Samtang ginatugyan na lang ni Saneo sa City Legal Officer ang desisyon sa pagpasaka sang panumbongon batuk kay Okpora.
Matandaan nga ginreklamo si Punong Barangay Eistein Okpora sang mga katapo sang CDRRMO matapos nga ginpaguha sini sa quarantine facility ang nasambit nga LSI nga wala sang nakaigo nga koordinasyon sa mga otoridad.
