ROXAS CITY – Wala na sang plano ang mga himata sang mag-asawa nga nasapwan nga wala na sang kabuhi sa sulod sang ila balay sa Sitio Ilawod, Barangay Dinginan, Roxas City.
Ini ang ginkompirmar ni Police Master Sergeant Ramil Arcangeles, imbestigador kag tagpamaba sang Roxas City Police Station sang mainterview sang Bombo Radyo.
Suno kay Arcangeles nga nagapati ang pamilya nga wala sang foul play ang kamatayon sang mag-asawa bangud wala man sang may nadula ukon naglapta ang mga kagamitan nila sa sulod sang ila balay.
Magluwas diri, wala naman sang plano ang pamilya nga ipaidalom pa sa autopsy examination ang bangkay sang mag-asawa.
Matandaan nga base sa imbestigasyon nga nasapwan na lamang sang himata sang biktima nga nagabitay na ang mister kag wala na sang kabuhi ang misis sini nga nagahigda na sa katre.
Sa exclusive interview sang Bombo Radyo sa iloy sang wala na ginhingadlan nga mister nga antes natabo ang insidente ginapahayag nga ginpaguwa pa sini ang iya bata nga duha katuig sang mag-aga rason nga nakita na lamang sang iya ginikanan nga nagahilibion na ini.
Gintawag nila ang mag-asawa kag ginkatingala na lamang nila nga wala sang may nagasabat rason nga ginsid-ing nila ang sulod sang balay kag nakita man nga nagahigda nga kasubong nagakatulog lang ang babaye.
Apang ginkatingala nila nga wala ini nagasabat kag indi makita ang presensya sang iya bana.
Bangud diri, gintinguhaan sang pamilya nga makasulod sa ila balay kag didto nakita nga nagabitay na ang ila bata kag wala na sang kabuhi ang ila umagad.
Nahibaluan nga gintabunan pa sang habol ang lawas sang babaye kag may nakita naman nga lagob sa liog sini.
Ginapahayag nga may yara sang nervous breakdown ang ila bata apang nag-ayo naman ini.
Magluwas diri, may yara sang ginainom nga bulong ang mister nga pangpatulog.
Gintuad pa sini nga kilala ang iya bata nga mabuot sa ila lugar gani nagapati ang pamilya nga wala sang foul play ang kamatayon sang mag-asawa.
Dugang pa sini nga nagpanindahan pa ang mag-asawa sang adlaw antes natabo ang insidente para ibaligya sa ila nga tiangge.
Samtang, tuman na lamang ang kasubo nga nabatyagan sang ila pamilya sa natabo sa mag-asawa.
