ROXAS CITY – Wala ginabasol sang himata sang biktima nga nakuryente, ang pamunuan sang Capiz Electric Cooperative (CAPELCO) sa kamatayon sang ila padre de pamilya.
Matandaan nga ginkilala ang biktima kay Gerald Napacia Ballao, 41-anyos kag residente sang Brgy. Rizal, banwa sang Pontevedra.
Sa panaysayon ni Debbie Ann Ballao, bata sang biktima nga wala na sang power ang naglaylay nila nga kable sang kuryente bangud masobra na isa ka bulan nga gin-utdan sila sang kuryente.
Dugang pa sang bata nga tuyo lang kuntani nga himuson sang iya amay ang nagalaylay nga kuryente, apang sa iya nga pagbutong, posible nga nakaduot ini sa iban nga kuryente nga live wire, nga gintunaan sang iya kamatayon.
Nahibaluan nga gin-utdan sila sang kuryente bangud sa kapaslawan nga makabayad sang ila electric bill.
Masakit man kuntani ang natabo sa ila padre de pamilya apang nagapati sila nga aksidente ang natabo.
Luyag man ini kuhaon nga kahigayunan sang pamilya Ballao nga magpanawagan sang bulig-pinansyal sa pagpalubong sang ila amay.
Sa may mabinulawanon nga tagipusuon, magkontak sa numero: 0950-553-1402.
