Tuman ang paghinulsol sang hinablos nga nagpatay sa iya tiyo pinaagi sa paghaboy sang bato sa Barangay Malapad Cogon, Sigma, Capiz.
Sa exclusive interview sang Bombo Radyo kay Lony Olithao 39-anyos, ginpahayag sini nga wala siya magdahum dahum nga mapatay sini ang tiyo nga si Digno Olithao nga isa ka barangay tanod.
Gintuad pa sini nga wala man sila nagbaisay sang biktima, antes natabo ang insedente.
Aminado ang suspek nga nakunsensiya ini sa pagkamatay sang tiyo, apang ginapanindugan nga indi sini intensyon ukon indi hungod ang natabo.
Sandig sa imbestigasyon sang pulisya nga una sila nag-inum sa balay sang biktima kag nakahapit pa sa isa ka balay sa diin liwat sila nag-inum.
Liwat pa gid sila nga nag-inum sa balay sang isa nila ka himata nga isa ka barangay tanod sa diin nagbaisay kag nagtapungulay sila tobtob ginaalegar nga ginhaboy sang suspek sang bato ang biktima sa diin naigo ini sa tangkugo.
Ba-se sa resulta sang otopsiya sa bangkay sang biktima nga naglupok ang ugat, naglitik ang tul-an kag nag-angkon sang blood cloth nga gintunaan sang iya kamatayon.
Desidido sa karon ang pamilya sang biktima nga pasakaan sang kaso ang suspek agud mahatagan sang hustisya ang kamatayon sang ila himata.
Samtang ginapanindugan naman sang amay sang suspek nga indi sini pagtolerahon ang sala sang iya anak.
Gintuad pa sini nga sa tagsa ka makainum ang iya anak kasubong nga ginasaniban ini nga indi niya maintindihan.
