ROXAS CITY – Matapos ang 20 ka bulan nga yara sa estado sang “sede vacante” ang Archdiocese sang Capiz, pormal na nga gin-install bilang ika-apat nga Arsobispo sa nasambit nga Archdiocese si His Excellency The Most Rev. Victor Barnuevo Bendico, D.D.
Ginpangunahan ni Apostolic Nuncio to the Philippines Most. Rev. Charles John Brown, ang nasambit nga installation.
Naghatag man sang iya mensahe ang ika-tatlo nga Arsobispo sang Capiz kag sa karon Arsobispo na sang Archdiocese sang Manila nga si His Eminence Jose Cardinal Advincula Jr., D.D.
Ginatos man nga mga Kaparian lakip na ang mga Pari sa Diocese sang Baguio ang nagpadulong diri sa Capiz.
Sa mensahe sang bag-o nga Arsobispo, ginpasalamatan sini ang Ginoo sa panibag-o nga pagpanghangkat sa iya pagtuo kag nagpangayo sang giya nga madumalahan sini ang 67 ka mga parokya kag mission-stationkag ginatos ka libo nga tumuluong Kristiyanong Katoliko.
Wala man sini ginkalipatan nga pasalamatan ang mga taga-Baguio nga personal nga nagpadulong diri sa Capiz, agud masaksihan ang instulasyon sang ila anay Obispo.
Pagahidlawon naman ang mga tumuluo sang Baguio, bangud nagbiya na sa ila nga Diocese si Msgr. Bendico, apang malipayon sila bangud sa iya puloy-an nga amu ang Capiz ang assignment sang Arsobispo.
Ginpahayag man sang magulang nga babayi ni Msgr. Bendico nga si Cecilia Bendico-Manaog nga sadto paman handum na sang ila Iloy nga mangin Pari ang naga-isahanon sini nga utod nga si “Toto.”
Ginapangamuyo sini kag sang ila mga himata nga padayon nga hatagan sang maayo nga lawas agud madumalahan ni Bendico ang bug-os nga Simbahan sang Capiz.
