ROXAS CITY – Hisa sa politika ang isa sa mga rason nga ginalantaw ni Atty. Matt Hachuela alkalde sang banwa sang Dumarao, angut sa pagpanghaboy sang granada sa guha sang iya puluy-an kahapon Agosto 7, kadungan sang pagsaulog sang fiesta sa ila banwa.
Sa interview sang Bombo Radyo kay Hachuela, ginpahayag sini nga bangud sa mga ginpanghimo sini nga pagbag-o sa ila banwa ang posible nga nagtulod sa mga suspetsado nga wala makilan-an nga naghimo sang seryuso nga butang.
Nagapati man ang alkalde nga taga Dumarao lamang ang may kaisog nga maghimo sini, bangud base sa kuha sang Closed-circuit television (CCTV) nahibaluan sang alkalde kung sa diin nagikan ang direksyon sang motorsiklo nga gingamit.
Makit-an man suno diri sa suspek nga may yara sang nerbyos sang tion nga ginhaboy ang granada sa guha sang iya puluy-an kag makabig nga indi ini sagad bangud wala sini na-release sang intsakto ba-se man sa pahayag sang mga otoridad matapos ang ginpatigayon nga imbestigasyon.
Mahibaluan nga sumugod nagpungko si Hachuela bilang alkalde sang banwa sang Dumarao, madamo na ini sang may ginpanghimo nga proyekto sa diin makapabag-o sa ila banwa.
Pila sa mga ini amu ang pagpakay-o sang mga wasak nga dalan, pagpatiles sang madugay na nga wasak nga merkado publiko kag pagpatuman sang pagsulundan nga nagadumili sa mga motorsiklo nga magbyahe nga wala sang helmet kag madamo pa.
Apang sa pihak sang natabo sa alkalde, gintuad man sini nga wala siya nakabaton sang mga threat messages kun sa diin magatulod sa iya nga magkahadlok sa baylo may pila ka mga kaangay sini nga alkalde ang nagpalab-ot sa iya sang kahangawa subong man ang mga pumuluyo sang Dumarao.
Matigdas man nga ginsiling sini nga bangud nangin malinong kag matwhay ang pagselebrar sang ila kapistahan, posible naghimo na lamang suno diri ang mga tawo nga may kaakig sa iya sang butang agud makakuha sang atensyon kag masiling nga isa ang ila banwa nga magamo kag indi mauntat-untat.
Samtang, nagapati sa gihapon ang alkalde nga indi na magdugay kag madakpan ang yara sa likod sang pagpanghaboy sang granada sa guha sang ila puluy-an.
