ROXAS CITY – Ginpakigbahin sang isa ka propesor sa syudad sang Roxas ang iya nangin eksperyensya sadtong gindeklarar kag tinion sang Martial Law.
Sa interview sang Bombo Radyo kay Dr. Surreal Soquiño, History Professor sa Filamer Christian University, 7-anyos siya kag nagapuyo sa Negros Occidental sang nakita niya sa telebisyon sang iya kalapit balay ang pagdeklarar ni Ferdinand E. Marcos Sr. sang Martial Law sa bug-os nga Pilipinas sadtong 1972.
Suno sa propesor, amat-amat nga nagbukas ang iya pagtalupangod sa matuod nga nagakatabo sang nakita sini ang pag-abuso sang militar sa ila posisyon kun sa diin nagpatigayon sang iligal nga pagpangdakop, pagpanulod sa kabalayan, massacre, kag madamo nga aktibista sa ila probinsya ang ginsilutan kag gindakop nga wala sa ginpakita nga mandamiento de aresto sa sulod sang tuig 1972 tubtob 1986.
Maluwas sa pagpang-abuso nangin lapnagon man ang graft kag korapsyon sa gobyerno.
Bangud diri, ginpahayag ni Soquiño nga tuman ka importante ang pagkomemorar subong sang ika-50 anibersaryo sang Martial Law bangud kabahin ini sang kasaysayan nga nagakadapat mapabilin kag matun-an sang tanan ilabi na sang kabataan.
Siguraduhon man nga verified kag reliable ang ginabasa ukon ano man nga ginahalinan sang ginatun-an.
Matuod suno diri nga may ginpatukod nga mga imprastraktura si Marcos Sr. apang indi tanan ang nakabenepisyo.
Para sa iya, indi maayo ang pagdeklarar sang Martial Law bangud sa nangin resulta sini nga pagpang-abuso sang militar, nakontrol ni Marcos ang lehislatura, hudikatura, kag mass media rason nga gintawag siya nga diktador.
Dugang pa sini nga wala napadayon sang mga masunod nga administrasyon nga mapabilin sa mga buluthoan ang pagtudlo sang martial law rason nga nagapati siya nga ang ihibalo sang kadam-an sa mga kabataan zero tubtob subong, dugang pa nga nagatinguha ang mga pro-Marcos iliko kag panason ang kasaysayan ukon ang ginatawag nga “history distortion.”
Gintuad sang propesor nga kapin 3,240 nga mga aktibista ang nagkalamatay, 34,000 ang ginsilutan, kag 70,000 ang ginpangpreso nga ginakabig niya nga labing una nga natabo ang extra judicial killings sa pungsod.
Gani luyag man sini nga kuntani bag-uhon na ang polisiya sa pagtudlo sang kasaysayan kag luyag ipalab-ot sa mga manunudlo sang Araling Panlipunan nga dapat mangin bunayag sila sa pagtudlo sa mga kabataan.
Itudlo sang patas ang maayo nga hinimuan kag ang malain nga natabo sa kasaysayan nga yara sa libro kag iban pa nga pagtulun-an.
