ROXAS CITY-Ginpanginwala sang Punong Barangay sang Barangay Santa Fe sa banwa sang Pilar nga may yara sang hukos pukos sa piniliay sang mga benepisyaryo para sa tag P3,000 nga bulig pinansyal ni Senator Christopher Bong Go para sa mga magagmay nga mga vendors sa probinsiya sang Capiz.
Sa interview sang Bombo Radyo kay Punong Barangay Allan Cajurao ginpanindugan sini nga lunsay mga kwalipikado man nga mga vendors ang ginlakip sa listahan nga makabaton sang amo nga ayuda.
Gin-athag man ni Cajurao nga indi sang 32 ka mga vendors ang nakabaton sang amo nga ayuda bangud may yara sang tatlo ka mga benepisyaryo nga ginkakas sang mga validators matapos nga natukiban nga indi man sila mga kwalipikado.
Aminado naman ang opisyal nga ginlakip sini sa listahan ang iya ugangan kag bayaw apang ginpanindugan sini nga mga kwalipikado man sila bangud madugay nagabaligya man ang mag ini sang utan sa Balasan.
Ginpanginwala man sang amo nga punong barangay nga indi niya asawa ang nagalista sang mga pangalan sang mga benepisyaryo.
Suno kay Cajurao nga ang iya isa ka Barangay Tanod nga isa man ka vendor amo ang naglista sang mga pangalan sa amo nga bulig pinansyal.
Samtang nagpasalig naman ini sa mga wala nakabaton sang ayuda nga ilakip sila sa second batch.
Matandaan nga nagpalab-ut sang reklamo sa Bombo Radyo ang isa ka concern vendor matapos nga wala ini nakabaton sang nasambit nga bulig pinansyal.
