ROXAS CITY – Nagpaathag sa karon ang hepe sang City Health Office (CHO) angut sa importansiya nga makapaidalum sa ‘’Home Quarantine” ang mga naga-abot nga indibidwal gikan sa Manila.
Ginpahayag ni Dr. Lory Cahilog nga isa ini ka pamaagi sang preventive measure agud indi maglapta ang coromavirus disease ukon COVID-19 sa syudad sang Roxas.
Suno sa opisyal nga tanan ang nabalaka na sa pagduging sang nasambit nga virus sa diin halos adlaw adlaw nagataas ang numero sang nagakalatnan kag nagakalamatay.
Bangud diri, may yara sang direktiba si Mayor Ronnie Dadivas sa 47 ka mga punong barangay sa syudad sang Roxas kalakip sa iban nga mga opisyales sa barangay nga manin alerto sa magaabot nga mga indibidwal nga gikan sa Metro Manila sa diin madamo na sang kaso sang COVID-19.
Ginpahangup man sang opisyal sa mga barangay ang importansiya sang home quarantine partikular na ang mga persona nga may exposure ukon close contact sa mga nagpositibo sa Coronavirus disease.
Ginpa-intiende man ni Dr. Cahilog ang kinatuhay sang Persons Under Monitoring (PUM) kag Persons Under Investigation (PUI).
Dapat suno sa CHO head nga sundon sang mga PUM ang protocol sa ginatawag nga Home Quarantine sa sulod sang 14-diyas, sa diin ang nasambit nga persona na lamang mismo ang mag-isolate sa iya kaugalingon sa isa ka kuwarto sa ila balay nga well ventilated.
KInahanglan man nga i-separar sang PUM ang iya kagamitan kag indi pag-ilakot sa iya kaupod sa balay.
Nagpanugyan pa si Cahilog sang proper handwashing nga pila ka mag tips agud malikawan ang infection gikan sa virus magluwas pa sa social distancing.
