Ginpahayag ni Hon. Raymond Malapajo ang iya pagpasalamat matapos siya ang napilian bilang Presidente sang League of Municipalities of the Philippines (LMP) – Capiz Chapter para sa tuig 2025 tubtob 2028.
Sa interview sang Bombo Radyo, ginpasalig ni Malapajo nga isa sa iya ginatutukan amo ang pagtukod sang LMP Building sa may Capiz Doctors.
Suno sa iya, may yara na sang budget halin kay Senador Bong Go kag target niya nga antes matapos ang iya termino, matindog na gid ang amo nga building.
Dugang pa sang natungdan, nagapakita man sang paghiusa ang mga alkalde sa tagsa ka banwa sa probinsya agud mapabakod ang LMP-Capiz Chapter.
Ginpahayag man sini, nga sa iya una nga termino, nakahimo sila sang endorsements kag resolutions para sa PDI, DENR, kag iban pa nga ahensya sang gobyerno.
Ginsiling man ni Malapajo nga bukas ang ila grupo sa pagbaton sang mga nagakinahanglan, ilabi na ang may masakit, kutob sang ila masarangan nga mabulig.
Nagpasalamat man siya sa tanan nga mga alkalde sa Capiz sa padayon nga pagsalig kag suporta sa iya leadership halin pa sang iya una nga termino.
Gin-ako man niya nga may ara sang kakulangan sa nagligad nga term (2022–2025), apang ginpasalig nga subong iya pagatinguhaan nga mangin aktibo kag regular sa tanan nga meeting kag aktibidad sang liga.
Tinutuyo sang iya liderato nga mas pabakuron ang koneksyon kag kooperasyon sang mga banwa sa Capiz para sa mas epektibo nga paghatag sang serbisyo publiko sa mga pumuluyo.
Nahibaluan nga ginpatigayon ang piniliay sang mga opisyal sang LMP-Capiz sang Biyernes, Agosto 22, 2025.
Interviewed by: Bombo Sunnie Mae Batencila
