ROXAS CITY – Indi na maiisip sang 67-anyos nga honest-tricycle driver kun pila ka beses na ini nag turn-over sang mga pagkabutang nga nabilin sa iya tricycle.
Sa interview sang Bombo Radyo Roxas kay Manuelito Lorenzo, Honest Tricycle Driver kag residente sang Barangay Dayao sa sining syudad, wala gid ini nagduha-duha nga ibalik ang mga pagkabutang nga indi iya, bangud nagapati ini nga kun indi imo, indi dapat pag-angkunon.
Apisar nga pigado, bastanti kag kontento naman ini sa ila pag-ginawi bangud suno diri lunsay nagatimakas ang tagsa ka miyembro sang iya pamilya para malampuwasan ang kapigaduhon, kag wala gid ini nagakasilaw sa ing-gat sang mga pagkabutang nga indi halin sa ila tinimakasan.
Dugang ni Lorenzo, lain ang kalipay nga makabulig sa isig-katawo samtang wala nagapangayo sang kabaylo.
Panugyan ni Lorenzo sa tanan nga mga tawo ilabi na sa kapareho nga tricycle drivers, mag timakas kag indi pag-isalig sa suwerte ang kabuhi.
Matandaan, Wala sang pagduha-duha nga ginbalik ni Honest-Lorenzo ang napulot nga wallet nga may unod P31K nga nawigit ni Hazel De Castro nga iya man pasahero.
Nakabaton sang monetary reward kag pasidungog gikan sa mga kapulisan kag sa tag-iya sang wallet si Lorenzo sa iya kaayuhan nga ginbuhat.
